-صباح الخير يا حبيبي. -صباح الخير
-ومالك بتقولها كدا من غير نفس؟ داحنا لسه في اول اليوم! مالك؟
-ما عرفتش انام من شخيرك طول الليل! -اعمل ايه يا حبيبي! من تعب اليوم كله! شقاوة الولاد والتنضيف والغسيل والمواعين والطبيخ للغدا والمرواح للمدرسة وبعدها للسوق والرجوع من المدرسة والمذاكرة للولاد وتحضير العشا و… -بس! خلاص!
بلاش موشح كل مرة! وانا فين يا ست هانم من كل البرنامج دا؟
-ما هو يا حبيبي حط نفسك مكاني! انا عايزة ٤٨ ساعة في اليوم ومش لاحقة حتى اهتم بنفسي عشان ألاقي وقت ليك.
-أديكي اعترفتي بنفسك أهوه إني ماليش مكان في برنامجك!
-ما هو يا حبيبي وروح قلبي لو كان فيه وقت كنت ما استخسرتهوش فيك..خلاص اوعدك اول ما تيجي أجازة نص السنة ح
-انا لسه ح استنى تلات شهور! طب على الاقل ابقى غيري هدومك قبل النوم مطرح المطبخ واعدلي رقبتك
-يا حبيبي ما هو انت كمان بتروح الشغل وترجع تنام وبعدين تخرج تقابل اصحابك وترجع على نص الليل، ويوم الجمعة اسبوع عند مامتك واسبوع عند مامتي.. فين الوقت بقى؟
-وانا مالي اتصرفي! ما كل الستات كدا والا انت عجبة
-الستات الشقيانة زيي كدا واكتر، أما بقى اللي عندها شغالة ومدرسة خصوصي فهي اللي فاضية تتزوق وتتدلع وتدلع اللي معاها.
-بصي على الجرايد والمجلات اللي باجيبها كل يوم وشوفي الستات اللي بحق وحقيقي.. والا شوفي على النت!
-حاضر يا روح قلبي ولا تزعل يا عنيا..بس ابقى تعالى بدري شوية وبلاش تخرج بعد الشغل عشان تذاكر للولاد وانا ح أفيش الهوامش والملاحة الملاحة وح اقلع الطراحة! دانا ح اعملك فيلم العار كله!
-هو انا بتاع مذاكرة!! دانا اساسا ذاكرت لنفسي بالعافية لحد ما اتخرجت… -بالعافية برضه
ايوا عارفة! -وبعدين معاكي
-خلاص خلاص يا حوشاشة قلبي وزِعِرداء مهجتي
-ايه زعرداء دي؟
-ويعني فووت حوشاشة فاهمها يعني؟
-اصطبحي يا ست انت وقومي حضريلي الفطار خليني اغور من وشك
-ح تاخد الولاد للمدرسة على سكتك؟
-لا وديهم انت وح اسيبلك العربية
-لا شهم يا واد! ماشي من عونيا..عموما قوم شوف الجرايد على بال ما احضر الفطار، دانا عملتك هايلايت على اهم الاخبار
-ما تنسيش القهوة. -عونيا يا ابو حميد!
-يا ستار اخيرا سابتني في حالي! ايه الموال دا ع الصبح ما كانت راحت ع المطبخ من سكات! الولية دي قلبت دماغي.. لما اشوف ايه اللي في الجرايد.. يا نهار ازرق! مكتوب ان مصر فيها اكبر نسبة ستات ب تضرب اجوازها! ٦٦٪ من الرجالة رافعين قواضي على مراتاتهم عشان بيضربوهم!! يا ستار يا رب! لما اشوف الجرنال التاني.. يا خبر مدوحس! واحدة قتلت جوزها ب ٢٢ طعنة سكين عشان بيطلب منها شاي كتير! طب واللي بيطلب قهوة زي حالاتي مش كاتبين حاجة عنه؟! ايه الاخبار اللي زي الزفت دي ع الصبح! وايه الخبر دا كمان! واحدة قتلت جوزها بالشومة على دماغه عملتله تربنة عشان بيعملها دوشة في البيت! يا سنة سوخة! وايه دي كمان! واحدة قتلت جوزها واتصورت سيلفى مع جثته قبل ما تطلب البوليس بنفسها! ايه الاخبار دي على الصبح! هو جرى ايه للستات في مصر! (طرررراخ!) ايه اللي وقع عندك في المطبخ دا يا ست انتي؟
-ابداً يا حبيبي دي شومة اشترتها امبارح عشان اخوف بيها الولاد ساعة المذاكرة
-ششششومة!! انت جبتي شششومة؟
-يووه ما قلتلك ايوا جبت واحدة
-ومتعصبة ليه بس يا روح قلبي! هدي نفسك وما تزعليش.. هاتي اللي تحبيه يا حياتي
-باقولك ايه! انا مش لاحقة احضر الفطار! كفاية عليا القهوة
-أنا جاي يا روح قلبي أعمل الفطار والقهوة كمان تعالي انت ارتاحي.. انت شقيانة يا عيني
-خلص الفطار واعمل سندوتشات الولاد وروح البس بسرعة عشان تاخد الولاد على سكتك وانت نازل
-حححاضر يا قلبي.. اللي تشوفيه
-اعمل حسابك ترجع بدري عشان تذاكر للولاد أنا مش فاضية بعد الضهر
-طب واصحابي؟
-اصحابك زمانهم بيقروا أخبار النهاردة وما اظنش حد منهم ح يخرج من هنا ورايح
-اي
