طب ايه هفضل صاحى كتير؟ ما انا محتاج انام , بكرة هيبقى يوم طويل ….
لازم احط نهاية للوسواس الى قرب يقتلنى ده ..حطيت لحاف على لحاف و مخدة فوق مخدة و حشرت راسى تحتهم ..كان عندى امل ان عقلى يبطل .. يبطل يفتكر .. خلاص كفاية..الاوضه ضالمه كحل اصلا بس الضالمة ديه مكانتش كافية بالنسبالى حطيت راسى على معصم ايدى اليمين فى محاولة يائسة منى انى اهرب ..بس ازاى هتهرب من حاجة جواك؟
كنت فاكر ان اما ضلمت الدنيا موضوع التفكير ده هيقف .. و انى هنام خلاص بس بالعكس الموضوع زاد اكتر و بدأت افتكر بوضوح كل حاجة..الكلام الى قولته و مكنش ليه اى علاقة ولا يشبهنى ابدا …فاكر النظرة و رعشة ايدى ..فاكر كل حاجة ..و تبدأ حفلة الذكريات والتفاصيل اللطيفة الى عقلى بيجهزهالى كل يوم فاكر مواقف حصلت يمكن صحابها نفسهم نسوها او يمكن نسوها بعد الموقف اما حصل فى ثوانى بس انا منستش انا مبنساش …ده النسيان نعمة و انا شكلى اتحرمت منها.
كنت فى تالتة اعدادى …و كنت يمكن اكتر واحد بيتريق على الناس المرتبطة و الحب ,, و دايما بقول عليه موضوع اى كلام ..و بصراحة مش عارف انا كنت بقول كدة عشان فعلا قاصد الكلام ده ولا عشان مش عارف اوصل للبنت الى كنت معجب بيها……كانوا دايما بيتكلموا عليها فى المدرسة … كانت احلى واحدة تقريبا بس متفهمونيش غلط حلاوتها كانت فى انها عادية… اه عادية بس ديه بالذات خلت للعادى شعور تانى مكنش ليها فى التصنع ولا كانت بتحاول تلفت الانظار بأى شكل ..من الاخر كده هى عادية بشكل مبهر جدا.
رددت اسمها غصب عنى كذا مرة فى محاولة يائسة منى انى مبدأش افتكر بس مكنش فيه فايدة و تبدتى حكاية سيرين.
كان يوم عادى عادى خالص من ايام المدرسة المملة الى لحد دلوقتى انا مش عارف ازاى كنت طايق انى اخد 9 حصص فى اليوم و كل يوم نفس الجدول الممل مع نفس الواجبات و المدرسين المملين الى مش بفهم منهم اى حاجة.. يمكن عشان وجودها معايا فى نفس الفصل؟ بس ازاى؟ ده انا حتى كلامى معاها مكنش بيعدى جملة واحدة و كانت صدف بسيطة زى مثلا اما تستاذنى عشان افتح الشباك او اسلفها قلم و يعلم ربنا قد ايه الحاجات البسيطة ديه كانت بتفرحنى .. و الحاجة الوحيدة الى كانت مصبرانى على الايام المملة دي هى..اه هى عشان ببقى حاطط فى دماغى ان كل يوم ممكن الصدف البسيطة ديه تقلب حاجة كبيرة..وتخلينا نقرب من بعض ..
بس اليوم ده بالذات كانت جاية و واقفة لوحدها مبتهزرش مبتتكلمش مع حد خالص و باين عليها مضايقة… و انا طبعا لاحظت عشان انا متابعها …متابعها بكل تفاصيلها يمكن حتى محدش فى الفصل خد باله غيرى انا….بس لا زميلى على كان باصصلى و بيحاول على قد ما يقدر يشوفنى باصص فين و لمين منغير ما اخد بالى…. و فاجأة لقيته جايلى…
على: مالك ازيك ؟؟ كده تخش الفصل تعدى من قدامى منغير سلام ولا كلام؟ ولله عيب عليك..
دخلة رخيصة اوى عشان يفتح معايا كلام و خلاص ..احنا يا ابنى من امتى بنسلم على بعض انا اعرفك منين اصلا..بس طبعا الواحد مش عايز مشاكل و غصب عنه بيحاول يسايس فى الناس عشان يبعد عن وجع الدماغ..
أنا: انا تمام انت عامل ايه؟ معلش انا نايم متأخر امبارح و مش مركز ..
على: اها واضح انك مش مركز فى حاجة خالصالا معها هى..
أنا: معاها هى ؟
على: انت فاكرنى مش شايفك؟ يا ابنى انت من ساعة ما دخلت الفصل و انت عينك مبتنزلش من عليها طب لو عينك عليها كنت قولى و انا اظبطهالك مع انى محذرك منها كذا مره …البنت ديه مش كويسة ولله ما كويسة..انا عارف بقولك ايه..
كلام رخيص ملوش اى لازمة ..انا سمعت انه كان معجب بيها و اما صارحها رفضته بالذوق…
الله يرحمك يا على… خد واحدة You are my brother ردت فى صدره قتلته..
أنا: بص بصراحة يا على كل واحد ليه وجهة نظر …و انا شايف انها كويسة و جدا كمان فا من فضلك بلاش الطريقة بتاعتك ديه ..
على:انت هتقفش عليا ولا ايه يا عم خلاص براحتك بس انا حذرتك.
لذيذة اوى الناس ديه .. الى ماشية بمبدأ يا انا يا مفيش… ما اصل الموضوع مش عافية ولا عمره هيبقى عافية.
هيموت و يرتبط بيها و بيكره الناس فيها عشان تبقى تبعه هو و بس…يتكلم عليها بالشكل ده و يرجع يهزر معاها ولا اكن اى حاجة حصلت .. ده انت لقطة يا على ولله.
طب ايه هى قعدت و عمالة تبص فى موبايلها و فاضل ربع ساعة و الحصة تبتدى …اخش اكلمها و اقولها مالك؟ ولا ممكن تكسفنى ..اصل معلش ايه الى هيخلى واحدة ملهاش كلام معايا اصلا تحكيلى…طب استنى يمكن هى تقدر انى مهتم و كده لا ممكن الى بعمله ده يتفهم تطفل و بعدين كله اصلا بيكلمها و بيهتم بيها اكيد مش هكون حاجة مميزة يعنى و بعدين اصلا مفيش اوحش من الاهتمام اما يجيلك من الشخص الغلط .. بس فرصة زى دى مش هتتكرر تانى ..اعمل ايه بس…لا خلاص انا هخش دلوقتى….خلاص دلوقتى…
انا: س….سيرين ازيك؟
سيرين: تمام و انت يا مالك؟
انا: انا كويس جدا بس انا حاسس انك مش كويسة
سيرين: ايه ده هو انا باين عليا اوى كده
انا: بصراحة اه
سيرين: شكرا يا مالك على اهتمامك بس الموضوع بقى صعب اوى.
فجأة صحيت على صوت مستر روؤف و هو بينادى عليا و كل الفصل باصصلى…
مستر روؤف: ايه يا مالك ده …نايم على الديسك من قبل ما ابتدى الحصة طب يا سيدى استنى شوية و نام فى النص هاها بس مش من اولها كده ..يلا روح اغسل وشك و تعالى بسرعة.
و لقيت زميلى غندور بيبصلى و بيقولى wake up man بتريقة..
بقى كده يا غندور…الله يرحم ..ابوك كان بيحط الأولة فى التلاجة.
خدت بعضى و طلعت من الفصل بهدوء فى طريقى للحمام و انا حرفيا’ مْبلّم….
ماشى عارف كويس اوى انكلنا عندنا حاجات عارفنها..مش عارفنها و بس ..لا ده احنا متأكدين منها كمان لكن مش.. مش قادرين نتقبلهاولا هنتقبلها..
بقلم محمود حلمى